超好玩堅辛苦真興奮?
上水站至金鐘站總共有13個車站,由上水站起步,跑2公里左右就會到粉嶺站。起步時也遇到不少參加46km 或46km Team 的跑友在差不多時間出發。在不同的路段也遇上其他里數組別的參賽者。
由粉嶺站跑7公里左右就會到太和站,呢段路大多數都是沿着單車徑旁邊的行人路去,相對平坦。但有幾個位要過天橋所以要注意⚠️
太和站喺商場入面,所以大家記得要帶返個口罩先至好喺嗰度打卡而且盡量唔好圍咁多人一齊。
太和站過後,為咗避開大埔墟人多車多的街道,我哋沿着林村河到大圍外圍,沿河邊走跟住落去大埔墟車站行程約為4公里。
在大埔墟站打卡之後要走一小段回頭路,然之後過咗橋就會去到廣福邨。在大王爺廟附近公廁位置稍作休息及補水,繼續向吐露港方向前進。沿着單車徑旁邊嘅行人路會經過大埔坳碼頭(順便兜入去影相)跟住就繼續沿着單車徑去科學園。過咗科學園之後再過埋馬料水碼頭就要轉入行人隧道過去大學站。這段路沒有什麼樹陰,還記得有好幾次的線上馬拉松都是在這條路上進行,所以在這段路大家好像都開得特別快??‍♂️,不經不覺間推到每公里5分零八秒? 。由大埔墟去大學站大概5公里,跟住再經馬場旁邊一直去要轉上去火炭站打一打卡。大學站去到火炭站大約4公里左右。火炭站再跑多3公里就會到沙田站。
建議大家可以在沙田站買個飯團補充一下,我哋就在新城市廣場對住的沙田大會堂石級上食了一個飯團。因為上水去到沙田都差唔多25公里。
沙田過後我哋經沙田公園沿着城門河一直跑去大圍,喺大圍站有打卡牆可以喺嗰度打卡。跟住大家就可以沿着紅梅谷道去紅梅谷燒烤場方向準備上獅子山。紅梅谷燒烤場係可以有水機補水(免費)會建議大家喺嗰度稍作休息等齊人一齊上山。
喺紅梅谷燒烤場有兩條路一條係紅梅谷自然教育徑而另一條唔知叫咩名,我哋係會經左手邊嘅路上山,同樣都係會去到衞奕信徑5段的,跟住就兜去望夫石影張相然後就會沿着山路去到回歸亭,落山便去到獅子山公園。全程山路大約3公里左右 (當中經過我哋今日行程最高點大概都只係290米左右嘅高度)。
落咗獅子山之後我哋要過去對面馬路入去天馬苑然之後經天橋過龍翔道再轉落去竹園道及聯合道。過咗浸會醫院向前行過馬路之後經沙福道去九龍塘站。
九龍塘站之後就一直沿金巴倫道落去旺角東站。去到旺角東站我哋大概已經完成咗35公里。
由旺角東站我哋沿衛理道去到女童軍總會路口,然後轉右去拔萃女書院方向,之後一直沿着佐敦道去到佐治五世紀念公園轉落廣東道。廣東道往尖沙咀方向去到中港城就轉入港威大道,我哋走海港城裏面海邊條路一直去到天星碼頭。大家就記得響尖沙咀鐘樓打返張卡啦,個畫面都幾靚㗎。
跟住我哋就沿海濱星光大道一直去到麼地道花園對面位置有一條天橋可以俾我哋跨過梳士巴利道去到麼地道花園。之後經新文華中心一直上去紅磡站。咁當然要坐港鐵由紅磡站去會展站啦。係呢個時候我哋應該跑咗約莫43.5公里。
去到會展站有好多打卡位,大家就盡情打卡啦。我哋跟住跑多1.5公里左右經過金紫荊廣場在沿海濱跑一小段然後大約在政總方向轉左一直落就會到金鐘站,咁就結束今日嘅行程啦。用了8小時43分鐘完成今天東鐵綫13站全走之旅。
一個人跑得快,一班人跑得遠。高興能在46km 的路程上遇到咁多參賽者。在13個車站打卡,好有儀式感亦都帶回一些實體賽的感覺給我們呀。